開店以來，來試身的客人或者致電預約時，都有d common嘅問題關於試身or貨品，
或者想問又唔好意思問，
而家我會為大家解解頭頂上嘅疑團，
等各位來嘅時候都安心d。
客人 : 我想問下黎試身係咪一定要預約架?
店主 : 尖沙咀總店必須要預約，每位客人都係private appointment， 係一對一嘅試身服務，所以要先預約喔。太子分店就唔使預約，可以walk-in，不過只招待女士~
客人 : 我只係想上尖沙咀店睇下d款，睇左先決定試唔試，係咪都需要預約?
店主 : 上黎睇下當然歡迎啦，不過到尖沙咀店都請先預約，因為
1. 有d時間店內可能冇人，我可能會騰出空檔去左食飯、送貨、見客、返左廠等等….
2. 可能有其他客人正在試身，我要係試身室協助，恕不能分身招待閣下; 而正在試身的客人又可能會只穿少量衫褲在店內隨處選購物品，實在有點不便。
不過只要閣下約好時間，我必會給您最好的服務，淨睇唔試都冇問題。
客人 : 試身使唔使好似出面試婚紗咁收錢?
店主 : 唔使架，試咩都係免費架。(基於衛生理由，本店所有Nu Bra均不設試身)
客人 : 試完係咪一定要買嘢? 有冇最低消費?
店主 : 放心啦，試完係唔一定要幫襯架，
店主都係女性，當然明白要試到啱先買呢個道理，
各人喜好同身材都唔同，試完唔喜歡或者唔啱身都冇問題，
閣下上來對GLC產品感興趣已經非常感激，
即使閣下冇買嘢，將來想起有需要可能會再來幫襯架嘛，歡迎歡迎。
客人 : 試身需要幾耐時間呢?
店主 : 一般半小時左右，例: girdle & 束腹褲。(只作參考，視乎閣下試多少items)
客人 : 我男友可以在場等我嗎?
店主 : 尖沙咀店是可以的，店內有張梳化比佢嘆(有好幾位男士係呢處瞓著覺添)。
不過請留意 — 假設上一位客人仍未離開，男士就不便進入，
需要在外稍等一下，待那客人離開後便歡迎內進。
客人 : 我會一行4人來試身，可以嗎?
店主 : 有點抱歉，因為尖沙咀店只有一個試身室及一位職員協助及指導試身，
根據經驗，我們強烈建議每次最多3位一起來較為恰當(請預約時說明，因為需要預留較多時間才安排下位booking)，
否則您們需要等候的時間會好長好長…而且等候的座位只有2個呢….
順帶一提，如果只有閣下試身，又約好一班朋友之後去食飯，
都敬請最多邀請2位朋友在守候，因為尖沙咀店地方淺窄，
座位只有2個，避免造成不便喲，請見諒!
太子店無任歡迎，因為每位客人我地都會獨立照顧，而人手關係，太多朋友一齊來試可能要等等架。
<<有關新娘產品>>
客人 : Girdle係度身訂造定現貨?
店主 : GLC的girdle係現貨，唔係度身訂造。
分size嘅，試啱身冇問題可以即時取走。 有時某些size 或會有缺貨情況，
通常我先會在blog說明，
閣下預約時我都會盡量先知會您那些size缺貨。
客人 : 你地售賣嘅Girdle係咩牌子?
店主 : 係自家牌子GLC，於自己廠房設計及生產，
我們是誠意製作，上乘用料，舒適實用的。
好幾幢具規模之廠房設於佛山南海市及中山市，
主要製造外國品牌內衣出口，
定期有來自歐美之QC專員到廠裡監察品質及製造過程，GLC是店主分折出來之生產線，無論用料及技術都係優質水準，
並非山寨之作。
客人 : 我係準新娘，不過完全唔知應該要買乜?
店主 : 冇問題，睇下以下兩項幫唔幫到您—
1. 本店意見，準新娘一般先買一件合身的girdle去選pre-wedding 及big day嘅裙，
其他嘢例如nu bra、束腹褲等，可待您選好裙，視乎裙款再決定係咪有需要;
當然如果閣下下圍比較豐滿，都可一併買埋束腹褲。(如閣下之租衫公司係講明只需用nu bra就淨係買nu bra 啦。)
2. 先查詢pre-wedding及租衫公司，問清楚要帶乜去選裙。
客人 : 我需要買girdle，不過唔知應該幾時買?
店主 : 我們建議準新娘在第一次去選裙前最少2星期前買girdle(預留時間可能要修改)。
原因是一件合身or可助您改善身型的girdle絕對影響您選裙的款式。
舉例說: 我本身胸部不算突出，
不過GLC嘅Wonder Girdle再加胸墊將我胸部托得頗有睇頭，
我可以揀d低胸少少嘅裙款囉~~ 如閣下亳毛頭緒唔知自己適合揀咩裙，店主會比些少意見您參考一下，
當然租衫公司職員到時更專業地幫您啦。
客人 : 不過我一年後先big day喎，呢年會地獄式減肥，第時唔啱點算?
店主 : 唔使怕，我地有「免費修改girdle」服務，詳細請click此處。
客人 : 我想買Nu Bra，但唔知點帶，可以教我用嗎?出面買都唔教我用嘅。
店主 : 如在本店購買Nu Bra後，我們會提供免費指導服務，
教授正確使用方法，清洗方法及保存方法。
往後有任何使用上的問題，可致電我們查詢，
又或者約個時間再教一次，又或者睇片，無任歡迎~~
客人 : 就咁約上來買個nu bra會唔會太少嘢唔好意思架?
店主 : 傻啦，入得來買唔買嘢都係客人，買乜野係視乎個人需要，
每日都有客來淨係買胸墊、nu bra、bra帶等配件，
例如好多客人自己已經買左girdle，
只 係要買nu bra著露背裝，實在是平常事喔。
唔使咁客氣驚我賺得少喎，店主是賺是蝕無須向任何人交代，
只要夠錢交租就OK了。
如果您瘦到Kate Moss咁想買條束腹褲，我會阻止您架!!
客人 : 我胸部比較平坦，你地嘅girdle可以係big day將我變超級豐滿嗎?
或者著左你地嘅功能內衣，我下個月big day可以升級嗎?
店主 : 非常抱歉，要將胸部凝造特別視覺效果，
需要視乎閣下胸部情況，效果是按比例的，
比如說: 我是AA cup的，「加料」後終極視覺效果會是A-B cup，
B cup的「加料」後終極視覺效果會是C-D cup。
總括來講，由於每位女士嘅胸部大小、形狀、分佈及高低都不同，
所以每人嘅效果都不會相同，不可一概而論。您來試身時再慢慢解說吧~
另外，有關功能內衣，佢唔係魔術衣呢，不可能係短時間見效，
要穿之成習慣並正確使用，數個月後(因人而異)會開始見到改善，
例如減輕underarm舊賛肉啦、胸部變得集中堅挺等…..
客人 : 我胸部非常豐滿，有冇產品變細d? 唔想人地focus係我胸部。
店主 : 都係抱歉，功能內衣及girdle不能幫您縮細胸部。
換個角度，您更需要係保持堅挺，唔好令胸部過度下垂，
同埋向四周擴散，呢樣野一件具承托力嘅功能內衣一定幫到您! 相信所有女士都好清楚「地心吸地&年齡增長之相互關係」，
時間轉眼過，越重負擔越需要及早關注啊~~
仲有各類型疑問，歡迎致電我們~~
！也是作得太大吧？!
